(ខេត្តបន្ទាយមានជ័យ)៖ នៅព្រឹកថ្ងៃទី២៦ ខែកញ្ញា ឆ្នាំ២០២១ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានគណៈកម្មាធិការការគ្រប់គ្រងគ្រោះមហន្តរាយខេត្ត អមដំណើរដោយ ឯកឧត្តម គីម វីរៈ ទីប្រឹក្សា គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) និងជាអនុប្រធានក្រុមការងារសម្របសម្រួលជាមួយកងប្រតិបតិ្តការរុករក និងសង្គ្រោះគ្រោះមហន្តរាយ, ឯកឧត្តម ង៉ែត ចាន់ថុន ទីប្រឹក្សា គ.ជ.គ.ម. និងជានាយរងសេនាធិការចម្រុះ, មេបញ្ជាការង និងជានាយសេនាធិការយោធភូមិភាគទី៥, មេបញ្ជាការកងរាជអាវុធហត្ថខេត្ត, មេបញ្ជាការកងពលតូចថ្មើរជើងលេខ៥១, មេបញ្ជាការតំបន់ប្រតិបត្តិការសឹករងខេត្ត និងអាជ្ញាធរមូលដ្ឋាន បានចុះពិនិត្យមើលស្ថានភាពទឹក ផលប៉ះពាល់ផ្ទះសម្បែងប្រជាពលរដ្ឋ និងផ្តល់អំណោយសង្រ្គោះបន្ទាន់ ជូនដល់ប្រជាពលរដ្ឋចំនួន ២៥១គ្រួសារ ដែលកំពុងស្នាក់នៅទួលសុវត្ថិភាព ស្ថិតនៅសង្កាត់អូរអំបិល និងសង្កាត់ព្រះពន្លា ក្រុងសិរីសោភ័ណ និងនៅតំបន់ផ្លូវវៀងក្រុង ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ។
មានប្រសាសន៍សំណេះសំណាលនាពេលនោះ ឯកឧត្តម អភិបាលខេត្ត ក៏បានពាំនាំការសួរសុខទុក្ខ និងនាំយកអំណោយ ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធាន គណៈកម្មាធិការជាតិគ្រប់គ្រងគ្រោះមហន្តរាយ មកផ្តល់ជូនបងប្អូនប្រជាពលរដ្ឋដើម្បីដោះស្រាយការលំបាកមួយគ្រា។
ឯកឧត្តម អភិបាលខេត្ត ក៏បានថ្លែងអំណរគុណចំពោះ ឯកឧត្តម នាយឧត្តមសេនីយ៍បណ្ឌិត ទេសរដ្ឋមន្ត្រី គន់ គីម អនុប្រធានទី១ គ.ជ.គ.ម. ដែលតែងតែយកចិត្តទុកដាក់ខ្ពស់ និងចាត់ក្រុមការងារចុះប្រចាំការជាប់ជានិច្ច ដើម្បីពិនិត្យ និងសម្របសម្រួលការងារសង្គ្រោះប្រជាពលរដ្ឋនៅគ្រប់គោលដៅរងគ្រោះក្នុងភូមិសាស្រ្តខេត្តបន្ទាយមានជ័យនេះ។
ក្នុងឱកាសនោះដែរ ឯកឧត្តម ក៍បានណែនាំសូមពុកម៉ែបងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ និងស្តាប់តាមការជូនដំណឹង និងការប្រកាសរបស់អាជ្ញាធរ ដើម្បីជៀសផុតពីគ្រោះថ្នាក់នានា ដែលបង្កដោយជំនន់ទឹកភ្លៀងនេះ។ ឯកឧត្តម ក៏បានផ្តាំផ្ញើរបងប្អូនត្រូវចូលរួមអនុវត្តឱ្យបានដាច់ខាតនូវវិធានការ ៣កុំ-៣ការពារ របស់ សម្តេចតេជោនាយករដ្ឋមន្រ្តី ដើម្បីជៀសផុតពីការឆ្លងជំងឺកូវីដ-១៩។
